ضحكت وقالتلي : هنشوف الموضوع ده بعدين ، باي .
قولتلها : بعد اذنك افتحي تليفونك .
فتحت التليفون مسكته منها و سجلت رقم تليفوني عليه واتصلت علي نفسي ، و قولتلها رقمي معاكي وانا اخدت رقمك ، ممكن اكلمك ؟ ولا اسببلك ازعاج ؟؟
قالتلي : لا بالعكس انا فاضية علطول ، كلمني في اي وقت
.
سابتني ومشيت وانا طلعت الشغل وانا شايف الدنيا حلوة اوي ومش مصدق اني كنت واقف و اخدت رقم اجمل بنت شافتها عينيا !!!
ورغم اني كنت بقي عندي خبرة في العلاقات مع البنات لكن اترددت يومين ، عايز اكلمها وخايف لحد ما اتصلت عليها لكن خوفت وقفلت بسرعة !!
معتز : لأ مستحيل !! مش تيمو اللي يعمل كده !!!
تامر : وانا هكدب ليه يا ابني !! المهم بعد ما قفلت بسرعة هي اتصلت عليا ، واول لما شوفت رقمها قدامي علي تليفوني قلبي قفز في صدري من الفرحة .
جميلة ” تضحك ” : لقيتك رنيت وقفلت فقولت اتصل ممكن مش معاك رصيد !!
تامر : لا لا معايا طبعا ، انا قفلت لأني خوفت اكون اتصلت في وقت مش مناسب !!
ضحكت جميلة : قولتلك اني علطول فاضية اتصل اي وقت ، المهم بقي قولي انت اخدت رقم تليفوني ليه ؟ وايه حكايتك عايز ايه بالظبط ؟؟
” صوت تامر ”
انا خوفت اقول عايز اتجوزها او اخطبها لتصد.مني من اولها وتقولي فرق المستويات .
معتز : صح يا تيمو .
رديت قولتلها : حكايتي بدأت لما جيت اشتغلت في الشركة هنا في اول يوم وشوفت اجمل بنت في الدنيا كلها .
جميلة : مين دي ؟
تامر : انتي طبعا ، انتي يا جميلة اجمل بنت شوفتها في حياتي ، ومن اول يوم شوفتك وانا معجب بيكي ونفسي اكلمك ، وكنت كل يوم بتمني اشوفك وانتي نازلة لحد ما حصل موقف الكلب بعدها كنت بتعمد اكون موجود كل يوم قبل ميعادي علشان اضمن اني اشوفك .
جميلة : يعني انت بدأت تعجب بيا من اول يوم لك في العمارة ؟!!
تامر : ايوه خصوصا لما كنت كل يوم بشوفك تنزلي الصبح في نفس الميعاد !! انتي بتشتغلي اكيد علشان بتنزلي كل يوم في الوقت ده ؟؟
جميلة ” بارتباك ” : لا لا مبشتغلش خالص .
تامر : اومال بتنزلي كل يوم الصبح ليه وفي نفس الميعاد ؟
جميلة : بروح النادي ، انتي بتشوفني نازلة ومعايا الكلب ، معقول هروح شغل ومعايا كلب ؟؟
تامر ” يضحك ” : سورري انا غبي .
جميلة : فعلا .
تامر : نعم ؟؟؟
جميلة : اسفة ، مش قصدي ، اقصد انك مكنتش مركز .
تامر : ايوه ، لكن اكيد دخول النادي مش مرتبط بميعاد محدد !!
جميلة : ايوه .
تامر : و ليه كل يوم بتنزلي في نفس الميعاد !!!
جميلة : اتعودت علي كده .
تامر : انا معرفش اي حاجة عنك يا جميلة غير اسمك بس ، معرفش عايشة ازاي او مع مين او لكي اخوات او لأ ؟ انا معرفش اي حاجة عنك !!!
جميلة : وانت اللي يهمك ايه ؟ تعرفني انا ولا اللي عايشة معاهم ؟؟
تامر : انتي طبعا .
” صوت تامر ”
بعدها بدأت علاقتي بجميلة تكبر يوم عن يوم وساعة عن ساعة وبدأ اعجابي بيها يتحول لحب .
وكلامنا في التليفون اصبح مقابلات وخروجات وفسح ، ومع الوقت شوفت ان جميلة كانت بتصرف كتير جدا وبلامبالاة وعدم اهتمام وكأن عندها بحر فلوس عمره ما يخلص !!
