عند فريد وسارة . ( فريد وسارة قاعدين فى احد الكافيهات وزياد بيلعب في المنطقة المخصصة لاطفال ). فريد : وشك منور يا سارة . سارة بكسوف : ليه بتقول كدا . فريد : شكلك فرحانة علشان شوفتيه . سارة : مين؟. فريد : مراد . سارة : عادي . فريد : لأ مش عادي يا سارة . سارة باستغراب : هو في ايه يا فريد ..انا مش فاهمة ..انت مالك . فريد : لأ مستغرب بس ….انك ممكن ترجعيله بعد اللي عمله فيكي .
سارة : عمله فيا !!! دا يخصني انا محدش تاني ..لما حكتلك كنت في وقت ضعف ..محتاجة اللي يسمعني مش اكتر . فريد : اممم …طب وانا ..هاكون ايه بالنسبالك ؟. سارة : مش فاهمة . فريد : انا بحبك . سارة اتصدمت: دا اسمه جنان …انك تقول لواحدة انك بتحبها وهيا على ذمة واحد تاني دا اسمه جنان …انا عمري ما حسستك بحاجة ..عمري ما عاملتك الا اخ وصديق ….اوعى تكون فاكر ان ممكن احبك ولا افكر فيك ..لأ ..دا عمره مايحصل ابدا .
فريد : غريبة …بتتكلمي وكانك بتحبيه وبتموتي فيه . سارة : انا بحبه فعلا مين انت علشان تحكم على حبي …مين انت علشان تقول بحبه ولا لأ . فريد : لو كنتي بتحبيه لذرة … مكنتيش وجعتيه ابدا ..ولا عاقبتيه العقاب السخيف دا . سارة : انت اكتر واحد عارف اني كنت بندم وان القرار دا اخدته في وقت غضب ..بس خيانته ليا شئ صعب ..صعب اوي …مراد دا حب حياتي ..انا محبتش الا هو …يخوني ليه وعلشان خاطر ايه ؟
فريد : و هو عمره ما يسامحك ابدا على اللي عملتيه فيه . سارة : مالكش دعوة ….دي حاجة تخصه . فريد : طيب ..اهدي ..دا مجرد شعور جوايا وممكن اكون حاسس غلط سارة : طيب …ياريت متفتحش الموضوع دا تاني ..انت اخ عزيز عليا . فريد : طيب هاقوم اروح الحمام واجاي . ( فريد قام وسارة نفخت بعصبية ….زياد جة عليها ). زياد بخوف : ع…عا..عاوز اقولك حاجة . سارة حست بخوفه: قول يا حبيبي .
زياد ببراءة : بابا بيضربني…لما انتي بتزعلي منه .وكمان بيحرقنى بالنار انا بخاف منه اوي ..خديني عند ماما . سارة بصدمة : بابك بيضربك وبيعذبك …دا اتجنن ..اوعى كدا ( سارة رفعت تيشرت زياد وشافت علامات الحرق …اتصدمت ). سارة بدموع : يا حبيبي متخافش والله هاجبلك حقك . زياد : لأ ..مش تقوليله …خديني عند ماما بس . سارة : اخدك ازاي ..مامتك عند ربنا . زياد ببراءة : لا والله مش عند ربنا …والله ماما بتكلمني كل يوم من ورا بابا .
( سارة حست انها مش فاهمة حاجة …فريد مفهمها ان مراته ماتت في حادثة …فريد جه عليهم ). فريد : ايه جابك هنا …ماكنت بتلعب . سارة : عادي انا قولتله يجي …ممكن نمشي يا فريد . فريد بضيق : اوك يالا . *************************** في شاليه الجارحي
(الكل واقف بيتفرج على الاتنين اللي واقفين قصاد بعض من بداية زين اللي ماسك ايد ليليان والغضب بدء يتحكم فيه … وادهم واسر اللي واقفين مش عارفين يدخلوا بين اخوهم ومراته وعز الدين وليان اللي واقفين ورا مراد الالفي خايفين من منظر ابوهم واخوهم الكبير … ومراد الالفي اللي خايف ان زين يفقد اعصابه على مراد ابنه وتبقى ليلة حزينة على الكل ). ميرا زعقت : بقولك سيب ايدي … انا مش جاموسة بتجرني وراك كدا وخلاص .
مراد الجارحي بحدة : اخرسي خالص لغاية ما ندخل اوضتنا ولينا كلام تاني . ميرا بغضب : ولا كلام ولا زفت .. سيب ايدي . مراد زعق : لمي لسانك .. اصل وحياة امي هاطربقها فوق دماغك . ميرا زعقت وبتحاول تشد ايدها : طربقها فوق دماغك انت …. متقدرش تطربقها فوق دماغي . مراد بغضب : دماغ مين …. ماتلمي نفسك …. اه اقول لمين تلم نفسها لواحدة مش مظبوطة واقفة تترقص وسط الرجالة وتغني وهما يصفروا معجبة بنفسك اوي … دا من كتر حقارتك خليتي امي الست المحترمة تغني معاكي وهي طول عمرها محدش بيسمع صوتها .
ميرا قدرت تشد ايدها : انت واحد حيوان وانت اللي مش مظبوط نسيت نفسك امبارح وانت عمال ترقص وتحسس على جسم الرقاصة .. مين فينا مش محترم بقا . (مراد فقد اعصابه وضربها بالقلم على وشها وقعها في الارض ). مراد عيونه احمرت من كتر الغضب اللي جواه : قولتلك لمي نفسك … اذا كان ابوكي معرفش يربكي انا اربيكي واعلمك الادب . زين زعق بصوته كله لدرجه ان كل اللي موجود اتخض وليليان اللي ماسكة في ايده اتنفضت من مكانها : مررررررررررررررراد اظاهر ان انا اللي معرفتش اربيك كويس .
ميرا قامت من مكانها : احنا جوزانا كان غلط ..نار يوسف ولا جنتك …لو سمحت يا عمو زي ما جوزتني له …تطلقني منه . ( قالت كلامها وخرجت من الشاليه كله …الكل بعد خروجها بدء ينسحب بهدوء ويسيب المجال لمراد وزين … حتى ليليان. اتعلمت من الدرس وسكتت وراحت اووضتها بس جواها حزن من اللي حصل مكنتش تتمنى دا كله يحصل ).
زين اتحرك ووقف قدام مراد : انت في ايه مالك …لا قولي في ايه …انا مش فاهمك …مالك طايح فيها كدا ليه ..انت واعي اللي انت عملته … واعي ومدرك ولا لأ …انت ضربت مراتك قدام اخواتك ..ضربت مراتك ومديت ايدك عليها ….ايدك اللي هاقطعهالك لو اتمدت تاني يا مراد …موتي وسمي اللي بيضرب مراته …عارف ليه لانه ميبقاش راجل ..عارف دا بسميه ايه دا ضعف ياباشا اقولك انت هاتطلقها فعلا .. انا لايمكن اهينها معاك تاني ابدا .
( زين قال كلامه وسابه ومشي ….). مراد الالفي : انت عكيت جامد . مراد الجارحي بعصبية : انا مش عيل علشان كل شوية بابا يوجهني …مش كفاية جوزني لواحدة علشان بيحميها . مراد الالفي : مكنش ينفع تضربها كدا ….مكنش ينفع ..انتوا الاتنين غلطتوا ..زمان ابوك عطاني درس محترم علشان مديت ايدي على سارة ومن يومها وانا عهدت نفسي متحصلش تاني …مش معنى انك غيران عليها تتصرف بالهمجية دي . *********************** سارة بهدوء : فريد ممكن اخلي زياد يبات معايا .
فريد بشك : ليه ؟. سارة : علشان هو كان واحشني الفترة اللي فاتت دي كلها . فريد : طيب ….متتعبش طنط سارة يا زياد . زياد : ح…حاضر . ( فريد وصلهم الشاليه وسارة وزياد دخلوا واتفاجئت بمراد مع ماهي ). ماهي : كنتي فين ؟ سارة : كنت مع زياد بيشتري هدوم . مراد : عاوزك . سارة : انا ليه ؟. مراد : سيبي الولد مع ماهي وتعالي معايا . سارة : حاضر.
( مراد اخد سارة وراحو على الشط ). مراد : اقعدي . سارة : فين ؟. مراد : على الرملة . ( سارة استغربته وقعدت وهو قعد قدامها ). مراد : مش عاوزة تعرفي خنتك ولا لأ . سارة : هاتقولي ليه ؟. مراد : علشان تبطلي دوامة التفكير اللي فيكي …وعلشان تقتنعي ان الحياة ما بينا مستحيلة بعد اللي هاقوله . سارة : وياترى ايه اللي هاتقوله .
مراد : لارا بنت اللواء عدلي العمري ….ابوها متورط في قضية تهريب اثار …فاتح شركة وهمية باسمها شركة استيراد وتصدير ومعاهم رجال اعمال كبار في الدولة متورطين …حاجة كدا زي الخلية .. اللواء عدلي له مكانة رفيعة في جهاز الشرطة لازم لما يمسكو عليه حاجة تكون بالادلة ….مسكت القضية دي وبدات اتقرب منها … ساعدتهم في كام حاجة للتهريب بعلم قيادتى في الشغل علشان يطمنوا ليا … كنت بحكيلها عنك و وكنت بوهمها ان طلقتك بس سبتك عايشة في بيتي…كنت متاجر بيت تاني علشان اللي بيراقبني يتأكد اني مطلقك ….
كنت بخرج معاها وبسهر …روحت بيتها كام مرة بس كانت كلهم مقابلات عادية وسهرات عادية ..
عرفت تقريبا كل المعلومات والادلة منها …اخر مرة روحت شقتها في اليوم اللي انتي شفتيني فيه …كانت اخر مرة ..سجلت ليها صوت وصورة … و ابوها ومعظم اللي معاهم في الخليه دي اتقبض عليهم … انا منكرش ان اتفاجئت لما لاقيتها لابسة كدة كانت كل مرة تبقى عادي بلبسها ..بس كان لازم اخاد منها اخر دليل اتسايرت معاها وسبتها تتصرف زي ما هيا عاوزة … الباب لما خبط كنت بحسب انهم هايعجلوا معاد القبض عليها وخصوصا ان انا مش ادتهم اشارة القبض …بس اتفاجئت بيكي ….
انتي نزلتي من هنا وقبضنا عليها … روحت وراكي البيت مش لاقيتك ..دورت فى كل مكان اختفيتي ..كنت زي التايه ..وندمت ان رجعت شغلي تاني …بعدها بلغوني انك كنتي متأجرة عربية ..
الشركة اللي مأجرة العربية بلغت انك مش سلمتيها في نفس المعاد المحدد في العقد لما بحثوا بارقام العربية لقوكي عاملة حادثة والعربية مولعة وجثث مولعة ومش ليها ملامح … اخدو عينة وعرفوا ان البنوتة اللي ماتت بنتي والطب الشرعي اثبت ان الجثة التانية انها انتي ..مهاب لعبها صح وانا صدقت …عمري ما كنت اتخيل للحظة ان دا كله كدب … عمري ما كنت اتخيل ان دماغك تجيبك للشر والانتقام دا مني …كنت في حالة وقتها زي الطفل اللي لسه بيبلغوه ان امه ماتت وابوه مات ومالكش حد في الدنيا دي …ضعفت وصدقت وعشت سنين في وهم وطلعت اكبر مغفل …مكنتش اتوقع
ان الوجع يجي منك …مكنتش اتوقع ان الانتقام دا يجي من اقرب حد ليا . سارة : …يتبع
