في الصباح ترتدي فاتن ملابسها تأخذ اجرها من سهير ثم تقول لها : فاتن : انا مسافرة البلد يا مدام . سهير : ليه يا بت ؟ والشغل ؟!!! فاتن : معلش مرات خالي ما.تت ولازم اسافر مع امي ، انتي عارفة ان امي ملهاش حد غيري . سهير : والشغل يا فاتن ؟!! فاتن : معلش ، هو اسبوع واحد وارجع . سهير : اسبوع !!! ده انتي كده هتوقفي حالي . فاتن : معلش حقك عليا .
سهير : طيب يا تونه ، سافري وحاولي ترجعي بدري في اسرع وقت . فاتن : حاضر . تنصرف فاتن تشعر وكأنها قد نالت حريتها وحلقت في السماء . جلست في السيارة الاجرة عائدة الي منزلها بينما خيالها يحلق بعيدا في هذه النزهه السعيدة مع ذاك الشاب الوسيم ، ليس هذا فحسب ولكنها ستعود ايضا بالكثير من الاموال . نزلت من السيارة عند شارعها وسارت في سعادة وكأنها تحلق بعيدا . صادفت عينيها المبتسمة اعين حمزة !!!
ظن حمزة انها تبتسم له !!! دقات قلبه المتسارعة يكاد يسمعها المارة بجواره !!! لم تنتبة له ولكنها اكملت طريقها حتي دخلت منزلها . عينيه مازالت مبتسمه وقلبه مازال صخبه عال !! يوسف : حمزة … حمزة … يخربيتك !!! حمزة : هااا .. فيه ايه ؟؟ يوسف : بكلمك من بدري مش بترد عليا !!! لسه البت شغلاك ؟؟ حمزة : ضحكتلي النهاردة يا جو !! يوسف : عادي وفيها ايه ؟؟ ما هي بتضحك لغيرك كتير !!!
حمزة : لو اتكلمت عنها كده تاني هيكون اخر كلام بينا . يوسف : مينفعش اشوفك بتعلق نقسك بواحدة زي دي واسكت . حمزة : تااااني !!! يوسف خلاص كده … يوسف : خلاص يا صديقي انا اسف . حمزة : متتكلمش عنها كده تاني ، اتفقنا ؟؟ يوسف : حاضر يا حمزة ، دي اخر مرة هجيب سيرتها ، بس عايزك تفضل فاكر كلامي ده علشان هتصدقه بعدين . حمزة : متشكر يا عم ، خلي نصايحك لنفسك .
تصعد فاتن وتوقظ امها من نومها … فاتن : ماما … ماما … اصحي بقي . الام : صباح الخير يا بنتي . فاتن : صباح الورد والفل . الام : ربنا يفرحك دايما يا بنتي . فاتن : يارب يا ماما ، يلا علشان نفطر بسرعة واجهز شنطتي وامشي . الام : هتسافري النهاردة ؟؟ فاتن : ايوه يا ست الكل . الام : ومالك فرحانة كده ؟!! انتي مسافرة تشتغلي ولا تتفسحي ؟؟!!
فاتن : شغل يا ماما ، اهو الواحد يغير جو ومناظر . الام : وانا اكون مبسوطة مادام شايفاكي مبسوطة يا بنتي . بعد الانتهاء من ترتيب حقيبتها تتصل بطارق … فاتن : صباح الخير يا مز . طارق ” بصوت ناعس ” : صباح الفل يا قمر . فاتن : انت لسه نايم ولا ايه ؟!!! طارق : خلاص صحيت اهو . فاتن : طيب يلا جهز نفسك بسرعة ، انا جاهزة .
طارق : بعد ساعة بالظبط هكون جاهز . تنزل فاتن الي جارتها أم امير … فاتن : ازيك يا خالتي ؟ ام امير : تسلمي يا حبيبتي . فاتن : والنبي يا خالتي خلي بالك من امي . ام امير : في عينيا ، انتي واخدة شنطتك ورايحة فين ؟؟ فاتن : مسافرة في شغل وهقعد اسبوع . ام امير : طيب سافري يا بنتي ربنا يقويكي ومتخافيش علي امك في عينيا . فاتن : ربنا يخليكي يا خالتي .
يخرج امير فجأة ويسألها : مسافرة فين يا فاتن ؟ فاتن : مسافرة في شغل . أمير : انا سمعتك وانت بتكلمي امي ، انا بسألك مسافرة فين ؟ فاتن ” بارتباك ” : وانت مالك !! كنت جوزي ولا خطيبي ؟!!! تضحك ام امير علي كلماتها ، امير ” بعصبية ” : لأ مش جوزك ولا خطيبك بس جارك وابن حتتك ومن حقي اعرف رايحة فين ؟ فاتن : مش من حقك ، لكن انا هقولك علشان خاطر خالتي ، مسافرة الغردقة .
ام امير : ربنا يجبر بخاطرك يا بنتي . فاتن ” تضحك ” : ما انا قولتلك جوزهولي يا خالتي !!! امير ” بسخرية ” : اتجوز مين يا بت ، يلا شوفي انتي رايحة فين .
